Burnley ayaa Manchester City kala soo saxiixatay daafaceeda Kyle Walker waxaana uu qalinka ku duugay heshiis labo sano ah. Daafaca midig ayaa dhameystiray tijaabada caafimaadka jimcihii, waxaana uu mar kale la shaqeyn doonaa madaxa tababare Scott Parker, kaasoo uu kaga soo garab ciyaaray Tottenham Hotspur labo xilli ciyaareed. 35-sano jirkaan ayaa 15 kulan u saftay qeybtii hore ee xilli ciyaareedkii hore City ka hor inta uusan amaah ugu biirin AC Milan bishii Janaayo, laakiin kooxda reer Talyaani ayaa go’aansatay inaysan ka dhigin mid joogto ah. Walker waxa uu ku guuleystay 17 koob waqtigiisii Etihad Stadium, waxaana uu qeyb ka ahaa kooxdii ku guuleysatay Treble 2023.
Wuxuu u saxiixay City xagaagii 2017 wuxuuna u saftay 319 kulan kooxda. Burnley ayaa dib ugu soo laabatay Premier League xilli ciyaareedkii hore ka dib markii ay u laabatay heerka labaad 2024. Walker waa saxiixoodii shanaad ee xagaagan, ka dib markii ay yimaadeen daafaca Axel Tuanzebe, daafaca bidix Quilindschy Hartman, goolhaye Max Weiss iyo garabka Faransiiska Loum Tchaouna.